SYUDAD sang Iloilo – Ginhatagan sang 83% nga rating sang Department of Interior and Local Government (DILG) ang syudad sang Iloilo sa pagpatuman sang road clearing operations santu sa mandu ni presidente Rodrigo Duterte.
Ang validation team sang DILG sa syudad Iloilo ginpamunuan ni Bacolod City DILG Director Ma. Joy Marideth Madayag.
Ang rating nga nakuha sang syudad mas mataas sa 70% ukon substantial compliance sang DILG Memorandum.
Ang paghatag sang rating ginbasi criteria nga 50% sa road clearing accomplishments kag 50% sa mga mekanismo nga ginapatuman sang syudad kaangay sang pagdihon ukon amend sang ordinansa, road inventory, displacement plan para sa mga apektado, rehab plan sang mga dalan kag madamo pa.
Una na nga ginpahayag ni mayor Jerry Treñas nga indi magnubo sa 95% ang accomplishment sang syudad.
Ginpaathag naman ni Anti Squatting and Illegal Structure (ASIS) Division Head Love Joy Hosenilla nga ang ginahatag nga figure sang syudad ara lamang sa clearing side kag wala pa nadala ang iban nga mechanisms.
Gin ako ni Hosenilla nga may barangays pa nga kulang ang compliance base sa evaluation kag validation sang DILG kaangay sang Tabuc Suba, Montinola, kag Benedicto sa Jaro samtang Ma. Calara, Monica Blumentritt kag kaiping nga mga barangays sa City Proper kag pila ka barangays sa Molo kag Arevalo.
Luwas pa ini sa pulo ka mga barangays nga una na ginsiling nga wala nagakooperar sa syudad sa clearing sang obstruction sa ila nasakupan.//JPF
