CANLAON CITY, NEGROS ORIENTAL – Patay na sang masapwan sang iya lolo ang 7-anyos nga bata matapos nga ginpatay ini sang iya mismo 34-anyos nga iloy sa Barangay Mabigo, Canla-on City, Negros Oriental.
Sono kay PO2 Jenelyn Cubero, Head sang Women and Children Protection Desk, Calaon City PNP, nga nadetain subong sa ila detention cell ang nasambit nga iloy matapos nga gin-ako sini nga siya ang nagpatay sa iya nga bata.
Nahibaluan nga ginpangita sang lolo ang iya nga apo apang ginsiling sang suspetsado nga yara sa likod sang ila balay ang nasambit nga bata.
Sang gin-usisa ini ang ginsulod sa bag nga daku kag ginsulod pa sa saku, ginhigtan ang iya liog kag gin-gapos ang mga kamot kag tiil.
Ang suspetsado nga iloy ang isa ka Overseas Filipino Worker (OFW), ang bag-o lamang nag-abot halin sa Saudi Arabia, kag ginasiling 17 ka adlaw nga nagpuasa ukon nagfasting upod sa amo sini nga Arabo.
Kaso nga parricide ang ipasaka batuk sa iloy. /dyHB BACOLOD
