Mamahimo na nga maka-avail sa mga nagkadaiyang benipisyo sa Philippine Health (PhilHealth) ang mga bag-ong miyembro niini.
Kini alayon sa RA 11223 kon ang Universal Health Care for All Filipinos nga naisabalaod adtong 2019.
Sumala ni Assistant Regional Vice President sa PhilHealth Region X nga si Delio Aseron II atol sa gipahigayong pagturn-over sa mga Member’s Data Record (MDR) ug IDs sa mga kaigsoonang Indigenous People’s sa Bukidnon kaganiha nga dili na kinahanglan maghulat pa sa pila ka bulan ayha makadawat sa mga benipisyo ang mga bag-ong miyembro kon dili epektibo na human nga mamiyembro ka sa Philhealth.
Gidugang usab niya nga pinaagi sa maong balaod, mas gitutukan niini ang pagprioridad sa katawhan nga angayan matabangan ilabi na sa mga naadmit sa mga balay-tambalanan.
Sulti usab niya nga dili na pwede balibaran ang mga katawhan nga naadmit sa balay-tambalanan kon ugaling walay-ibayad tungod kay matabangan na sa Philhealth.
Dungan usab sa maong pamahayag giturn-over ngadto sa mga kaigsoonang Indigenous People’s ilabi na ang mga miyembro sa Bukidnon Tagoloanon Mulahay Ha Kabukalagan Agricultural Corporation (BukTAMACO) ang mga MDR ug IDs alang sa mga Indirect Contributors sa Philhealth.
