MOISES PADILLA, NEGROS OCCIDENTAL – Nagalibog karon ang ulo sang kampo ni Moises Padilla Vice Mayor Ella Garcia-Yulo kon ngaa tubtub sa karon wala gihapon nadala sa Hall of Justice ang bise alkalde para mag submit sang counter affidavit.
Suno kay Mark Garcia, utod ni Vice Mayor Garcia-Yulo kag Punong Barangay sang Brgy. 1 sa amo nga banwa, sa interview sang DYHB nga sa ikaduha na karon nga tinion, wala na naman nadala sa Provincial Prosecutor’s Office ang iya utod para kuntani maka submit na ini sang counter affidavit sa kaso nga ginfile batuk sa iya sang Moises Padilla PNP.
Nahibaluan nga sini na kuntani nga adlaw gintalana ang pagdala kay Vice Mayor Garcia sa Hall of Justice agud nga maka submit na ini sang iya counter affidavit sa kaso nga illegal possession of explosives nga ginpasak batuk sa iya kag sa iya bana nga si Felix Yulo III.
Base sa ila sugilanon, ginsiling ni Mark nga ang rason ni Moises Padilla PNP Chief of Police SInsp. Allan Reloj kon ngaa wala nadayon sini nga adlaw ang pagdala sa iya utod amo nga bangud kulang sila sa manpower.
Madumduman nga sadtong nagligad nga Biernes, December 22, gintalana man kuntani ang pagsubmit sang bise alkalde sang iya counter affidavit, apang wala ini nadayon bangud gintutukan sang Moises Padilla PNP ang natabonsini nga threat nga sudlon sang NPA ang Municipal Hall./ Ricky Filoteo photo
