Sapon sa duty searcher sa Lumbia City Jail ang usa ka inahang nagdala og 30-mil pesos nga gibutang sa pribadong parte sa lawas niini.
Ang maong babaye nibisita sa City Jail mga alas 9:50 kagahapon sa buntag apan wala makalusot human nasapon ni JO1 Aileen Ipanag.
Namatikdan nga nibukdo ang pribadong parte sa maong inahan maong gisusi ni JO1 Ipanag.
Sa interview sa dxCC-RMN kang JO3 Orlan Montalban, Information and Community Relations Service Officer sa Lumbia City Jail nga human marecord ang maong insedente giuli ra sab ngadto sa inahan ang maong kwarta ug wala na gitugotan nga makita ang iyang anak.
Nasayran nga mobisita unta ang maong inahan sa iyang anak nga dunay kasong may kalambigitan sa druga.
Gipasabot usab ni JO3 Montalban nga tres mil pesos lamang paubos ang pwedeng mahawiran sa mga piniriso aron malikayan nga magamit sa paghimo og mga dautan sa sulod sama sa pagpalit sa druga, pagpalit sa sigarilyo, magamit sa pagkontrol sa ubang piniriso ug uban pa.
