Report ni: Tita Jen Palomo Debaja
Nagapabilin pa asta subong sa kritikal nga kondisyon sa North District Hospital ang 32 anyos nga taga Antique matapos gina alegar sang employer nga nagtuyo ini nga maghikog paagi sa pag inom sang insecticide kag pagbitay sang kaugalingon sa CR gamit ang cable wires.
Apisar naglapta ang balita sa lokal media nga utang ang rason sang paghikog sini, ginklaro sang mister sa RMN Iloilo nga indi ina matuod kag 8 na katuig ang iya asawa sa mga amo.
Dugang pa sang mister nga nagpauli pa ang iya misis sa Antique sang Hunyo 25 kag wala man sila sang ginbaisan. Gina ekspektar nga maga abot ini sa Hong Kong sa Miyerkules para mag atipan kag magbantay sa iya misis sa ospital.
Base man sa mga rebelasyon kahapon sang pila ka kaabyanan sa ospital, daw imposibli patihan nga naghikog ang pasyente. Suno sa kaingud sa Antique nga amugid ang naga pakig estorya sa doktor kag mga nurses, wala sang nakit an nga kemikal sang pesticide sa lawas sang pasyente. Wala man sila nagapati naghikog ini tungod ka imposible maghukas ka pa sang kesame sa CR para may kabitan sang cable wire.
Dugang diri, empty na ang data sa cellphone sang pasyente antis ihatag sang employer sa mga police.
Suno pagid sa pahayag sang iya isa ka abyan, antis natabo ang insidente, nakatawag pa ini takna alas 10 sang gab-i kag nagpanuaron sang iya problema. Nagpalab-ot man ini sang kahangawa kon ano ang himuon sang amo tungod nakita sa CCTV nga gin patup-an sini ang bata sang employer.
Sa karon, naga kinahanglan ang aton kasimanwa sang aton pangamuyo para sa iya pag ayo.
Padayon pa ang imbistigasyon sang HK police sa kaso.
