BACOLOD CITY – Nagaapelar karon si Bacolod Election Officer Atty. Mavil Majarucon-Sia sa mga botante nga indi pagpili-on ang mga kandidatu nga naga-violate sa mga pagsulundan sang Commission on Elections.
Ini ang panawagan ni Sia sa atubang sang pahayag nga handa na ang COMELEC para sa patigayunon nga Barangay kag SK Elections sa Lunes, Mayo 14.
Suno kay Sia nga indi na siya magpanawagan pa sa mga kandidatu kundi sa mga botante na gid lamang.
Apelar ni Sia sa mga botante nga indi dapat pagbutohon ang mga violators bangud nga kon indi gani makatuman sa rules sang Comelec ang mga kandidatu nga ini sila ang nagapadalagan pa lamang, ano na gid ayhan kon ini sila ang mahatagan na sang poder.
Ginpahayag sang election officer nga padayon ang ila monitoring sa violations nga na-commit sang mga kandidato apang indi nila pwede nga mahukas ang mga election paraphernalia nga illegal bangud may yara gid lamang ini sang 11 ka manpower nga tuman ka kulang.
Sa pihak nga bahin, ginpahayag ni Majarucon-Sia nga nag-abot na ang mga official ballots kag handa na ini para sa Lunes.
Pahayag ni Sia nga ang mga katapo sang electoral board ang magareport sa Comelec sa Sabado agud i-check kon bala ang tanan nga election paraphernalia ang kumpleto na./dyHB BACOLOD
