BREAKING – Isa na naman ka bangkay sang lalaki ang nasapwan nga naga lutaw lutaw sini gid lamang nga hapon sa area sang Danjugan Island, sa banwa sang Cauayan.
Ginpahayag nga ang amo nga bangkay ang nagasuksok sang blue nga panapton kag nakita sang mga mangingisda nga naga-lutaw lutaw sa kadagatan sang amo nga lugar.
Sa karon gina-verify pa kon bala ang amo nga bangkay iya sang isa sa mag-utod nga taga-Pulupandan nga mangingisda nga na missing sadtong January 16, 2019 samtang nagapangisda sa kadagatan sang amo nga banwa.
Ang bangkay ang nagasuksok sang bayo nga blue suno sa mga nakakita nga mangingisda.
Madumduman nga kahapon may isa man ka bangkay sang lalaki nga nasapwan sa banwa sang Cauayan kag kaina sang aga, gin-confirm sang Philippine Coast Guard nga iya ini sang isa sa mga missing nga si Rommel Palma-ira, 15 anyos ang edad.
Ini ang ginkuha na halin sa Cauayan kag ginlubong sa Pulupandan.
Nahibaluan nga si Rommel kag ang iya utod nga si Roben Palma-ira, 17 anyos ang nagpanagat sang nagligad nga Miyerkules sang hapon, Enero 16 kag wala na nakabalik sa ila pamilya.
