Patay ang usa ka babayeng negosyante sa nahitabong vehicular accident sa Abante, Barangay Poblacion, Tagoloan, Misamis Oriental mga alas 12:30 kagahapon sa udto.
Matud ni PO2 Lowel Miniano, traffic investigator sa Tagoloan Municipal Police Station nga ang biktima mao ang 31 anyos nga si Angel Paustor, dalaga nga taga Waterfall, Balingasag, Misamis Oriental.
Gibutyag ni PO2 Miniano nga nakisakay lang sa bongo truck si Paustor ug naipit sa dihang nabanggaan sa Rural Transit Mindanao Incorporated o RTMI bus nga ni-overtake sa laing sakyanan ug nakapaingon sa linya sa bongo truck nga maoy hinungdan sa maong insedente.
Padayon pang giatiman karon sa mga doktor sa Northern Mindanao Medical Center ang driver sa bongo truck nga si Aliene Magtuba, 38 anyos, minyo ug taga Waterfall Balingasag, Misamis Oriental human nakaangkon sa samad sa ulo.
Samtang matud ni PO2 Miniano nga mga ala 1:45 kagahapon sa hapon nisurender sa kapulisan sa Tagoloan ang driver sa bus nga nisibat tungod sa kahadlok nga mao si Wayne Rebia, 36 anyos, minyo ug taga Zone 12, Don Carlos, Bukidnon.
Mokabat usab sa kapin kon kulang 20 ka mga pasahero sa bus ang nakaangkon sa minor injuries nga dali usab nga giatiman sa management sa RTMI.
Gidugang ni PO2 Miniano nga sa Lunes ilang ipasaka ang kasong Reckless Imprudence resulting to homicide, damage to properties and multiple physical injuries batok sa driver sa RTMI bus nga si Rebia.
