Isa sa suspek sa pagpusil sa Brgy. Kapitan nan Brgy. Rizal, Surigao City nadakpan Nadakpan an isa sa mga suspek sa pagpamusil kan Kapitan Severo del Rosario nan Brgy. Rizal, Surigao City, ini human an taghimo na hot pursuit operation nan kadagkuan sa City PNP. Namahayag si Mayor Ernesto Matugas na base sa tagpaabot na impormasyon sa ija nan Chief of Police na si Supt. Jay Baybayan, an nadakpan ug tagtudlo na nagsilbi na driver sa motorsiklo nakilay-an na isa ka Rudy Arabes, 36 anyos, residente sa Brgy. Mabini sakop inin siyudad. Lakip isab na tag-imbitahan sa City PNP kagabii an laing tagtawag na Person’s of Interest na si Antonio Arana. Sumaya pa, gumikan sa CCTV footage na nakuha, natumbok si Arabes resulta sa tagsakyan na motorsiklo niini. Sa pagkakuman, taghanap pa an laing duha ka suspek na nagsilbi na triggerman ug kaibanan sa krimen. Isa sa anggulo na mitumaw sa panghitabaong krimen an away sa lupa partikular na an pagpaguba ni Kapitan del Rosario sa illegal na nagtukod nan mga panimayay sa Sitio Bioborjan, Brgy. Rizal. Una na tagpadayag ni Mayor Matugas an paghanjag nan reward na moabot sa P50,000 kon sin-o an makatudlo nan impormasyon sa suspek ug Mastermind sa pagpusil kan del Rosario.
