Dungan sa nagpadayon nga pagbatikos sa pipila ka grupo sa kampanya kontra illegal nga droga sa administrayong Duterte, gibutyag karon sa Philippine National Police nga adunay nisakay sa mao nga isyu.
Sa interview sa RMN Malaybalay ngadto kang PNP 10 Regional Spokesperon PSUPT Lemuel Gonda, gibutyag niini nga base sa ilang intelligence report, adunay mga grupong nisakay sa isyu sa war on drugs.
Matud ni Gonda nga apil niini ang kaso sa pagkamatay sa menor de edad didto sa Caloocan City.
Gikuwestiyon usab sa opisyal kung nganong nagpakahilom lang ang mao nga grupo kung adunay mga brutal nga gipangpatay, gipanglugos ug gipang-masaker tungod kay ang suspek nakagamit sa illegal nga droga.
Apan bisan pa man sa mga pagsaway, gipahayag sa PNP 10 nga magpadayon pa gihapon sila sa paghimo sa ilang mandato ilabina ang pagsumpo sa illegal nga droga.
Dugang pa ni Gonda nga dili makapaubos sa moral sa kapulisan ang mga gipagawas nga survey gani himoon kini nilang hagit ug ipatigbabaw ang due process ug ang pagrespito sa balaod.
