Patay ang duha pasahero sa double tire jeep ug 23 ang samaran sa dihang nahaybol kini sa bakilid ug pangpang nga dapit sa Barangay Taglimao mga alas 3:30 kagahapon sa hapon.
Si Lumbia Police Chief, Senior Inspector Bernard Colegio, mipa-ila sa duha ka patay nga sila Danilo Dablio, 43 anyos nga taga Barangay Tuburan ug Mario Pimentel, 80 anyos nga taga Barangay Pigsag-an.
Ang duha ka patay gidala pa sa mga rescuer sa J.R. Borja General Hospital apan dead on arrival.
Gipa-ila usab ni Colegio, ang mga samaran nga silang Delia Castilo, Emie Argangay, Pilar Dasdas, Erlinda Abonitalla, Marciana Abonitalla, Fresie Mae Abonitalla, Dalahay Bayhunan, Enecita Pauran, Leah Jane Abonitalla, Matmat Lucunran nga polos taga Barangay Pigsag-an.
Gipaila usab ni Colegio ang uban pang samara nga silang Dony Cagmat, Shanley Mabao, Erwin Hermosada, Felicitas Hermosada, Freddie Hernosa, Anabelle Lagoyan, Nita Garcia, Bebie Garcia, John Bryan Disanito, John Rian, Disanito, Lailane Disanito, nga polos mga taga barangay Tuburan, ug si Tuburan barangay kagawad Melinda Tinangcuran.
`Ang mga samaran nadala sa J.R. Borja General Hospital ug Northern Mindanao Medical Center.
Matud ni Colegio nga ang double tire jeep nga Tumpagon liner color blue nga nagdala sa Plate Number KVK-781 ang naka-rehistro sa ngalan ni Josie Asuncion nga taga barangay Lumbia.
Ang maong Jeep gi-drayban ni Rechie Macua nga taga Barangay Lumbia.
Matud ni Colegio nga sigon sa ilang imbestigasyon nga ang maong Jeep gikan sa Cogon Public Market ug nagkarga sa 57 ka mga pasahero ug mga kargamento ug padulong sa iyang ruta sa barangay Tumpagon.
Apan matud ni Colegio nga pag-abot sa maong Jeep sa bahada ug kurabada nga dalan sa Sentro Taglimao, nawad-an kini sa break nga maoy hinungdan sa pagka aksidente.
Matud ni Colegio nga ang duha ka mga patay nga sila si Dablio ug Pimentel didto nagsakay sa atop sa maong Jeep.
Sa dihang nahaybol ang maong Jeep, si Dablio ug Pimentel, mi-ambak, hinongdan nga mada-ogan sa maong Jeep nga nagresulta sa ilang kamatayon.
Ang duha ka mga patay gidala na sa Bollozos Funeral Homes.
Matud ni Colegio nga ugmang adlawa ang driver sa maong Jeep ilang pasakaan sa kasong reckless Imprudence, resulting to multiple Homicide, Physical Injuries ug Damage to Property.
Ang maong driver, detinado karon sa Lumbia Police station.
Matud sa maong driver nga si Rechie Macua nga iyang gipaningkamotan nga dili mahulog sa pang-pang ang iyang Jeep.
Apan tungod kay bahada ug kurbada ang maong dalan, na-loss control ang iyang manobila busa nahulog sa pangpang ang Jeep.
“Wala man gyud to toyo-a sir kay paglarma namo gikan sa cogon maayo pa man ang break adto pero pagbahada namo sa Taglimao, pagsipa nako sa break, wala na man mohawid” matud ni Macua.
