IFM Laoag- Opisialen a nagtugaw idi kalman Marso 4, 2020 dagiti 51 nga estudyante a napili kas Junior Officials iti local a gobierno iti siudad ti Laoag manipod Ilocos Norte National High School.
Segun iti Communication and Media Office dagiti Junior Officials a napili ket counterpart dagiti opisiales iti Laoag City Hall mangrugi iti Mayor agpatinggana kadagiti Department Heads ken dagiti adda iti babaenda.
Nangted met ti nababagas a mensahe ni City Mayor Michael Marcos Keon, kinunana a dakkel a tulong kadagiti Junior Officials dagiti kastoy nga aktibidad tapnon maimula iti panunotda dagiti trabaho iti uneg ti maysa a gobierno local ken iti panagserbi iti publiko.
Innayun ti Mayor nga adu dagiti mangayat ken agbalin a lider ngem babaen iti panaglabas ti panawen ken iti eksperiensia ket dagitoy dagiti mangparnuay a kapadasan tapnon mangidaulo ken agserbi.
Nakalanad met iti mensahe ni Vice Mayor Vicente Mandac Lazo para kadagiti Junior Officials, a paset dagiti agtutubo iti adbokasia iti “Baro A Laoag” tapnon maimuli kadakuada iti panamagbalinda a lider, “nationalism and patriotism” a panagrukbab iti soberania ti Pilipinas.
Kinuna pay iti Vice Mayor a dakkel ti agbalin a kontribusion dagiti agtutubo babaen iti panangipakatda ti laingda a mangsolbar kadagiti ‘Millennial Issues’ kas kuma iti suicide, gender equality ken dadduma pay.
Gapu ngarud iti daytoy mangnamnamada nga adu dagiti masursuronto dagiti ubbing iti panagtugawda. Paset pay iti panagsapata dagiti Junior Officials ni Mr. Jerry Carreon, Principal IV iti Ilocos Norte National High School kenni Ilocos Norte Schools Division Superintendent, Mrs. Vilma Eda, CESO IV. (Joe Anne J. Agustin, RMN News)
