Junk shop sa Barangay Nazareth, gisirad-an

20
PC: CIO

Gisirad-an sa kagamhanang lokal sa Cagayan de Oro ang usa ka junk shop tungod sa mga kalapasan sa balaod.

 

Ang junk shop gipanag-iyahan ni Niño Tagarda nga nag-operate sa 8th Street, Barangay Nazareth ning syudad.

 

Ang pagsira gihimo pinasikad sa Executive Order No. 155 nga gipagawas ni Mayor Oscar Moreno.

 

Basi sa kamandoan sa mayor, nag-operate ang maong junk shop nga walay business permit ug business license, bisan pa man nga nakadawat na kini og tulo ka notices of violations gikan sa Business Permits and Licensing Division kon BPLD Joint Inspection Team.

 

Nasayran usab nga ang maong junk shop nag-operate usab sa easement sa dalan busa na-apektohan ang dagan sa trapiko ug nakabalda sa mga lumalabay kon pedestrians.

 

Nakasupak usab ang junk shop sa Section 25 sa 1994 Codified Ordinance of Cagayan de Oro, diin walay gitugotan nga mag-operate og junk shop business sa Barangay Nazareth tungod kay kini usa ka residential area.

 

Niadtong Huwebes gi-serve ang closure order pinaagi ni Ms. Vivian Sabugaa, ang hepe sa BPLD, kauban ang mga personahe sa JIT, City Administrator’s Office, City Task Force Demolition, RTA, City Engineering, OBO, Legal Office ug kapolisan.

Facebook Comments