NEGROS OCCIDENTAL – Ang “mobile population” ukon pumuluyo nga masami nagasaylo-saylo sang ilistaran ang isa sa ginalantaw rason kon ngaa mabudlay ang pagpatigayon sang vaccination sa mga kabataan sa pila ka duog diri sa probinsya.
Suno kay Dr. Jessie Glen Alonsabe, Medical Specialist III sang DOH Center for Health Development ( DOH-CHD 6 ) nga ang Negros Occidental ang may yara sang pinaka-damo nga “very mobile population” bangud man sang mga trabahante sa kampo.
Ginsiling sini nga masami mabudlay nga malab-ot sang vaccination team ang mga sugarcane workers bangud pirme ini sila nagasaylo sang ilistaran, depende sa lugar nga ila ma-obrahan gani indi mapabakunahan ang ila mga kabataan.
Nahibalaun nga nagapabilin nga may pinakataas nga kaso sang Measles ukon Tipdas ang probinsya sang Negros Occidental sa bilog nga bahin sang Western Visayas.
Sa record sang Department of Health – DOH Center for Health Development nagapakita nga may yara sang kapin 298 ka mga suspected case sang tipdas sa probinsya.
Base man sa record, may 31 na ka kaso ang confirmed kag sa 4 ka mga napatay sa Western Visayas bangud sang tipdas, tatlo diri ang naghalin sa Negros Occidental./DYHB NEWSROOM
