General Santos City— Timailhan sa maayong pagtrabaho sa kapulisan ug militar ang pagkasikop sa miyembro sa Ansar Al Khilafa Philippines kon AKP sa Brgy. Bawing ning dakbayan nga si Jomar Maan.
Sumala kang Gensan City Councilor Jose Edmar Yumang, Chairman sa komitiba sa Peace And Order nga iyahang ginadayeg ang maayong inteligence network sa mga law enforcement unit sa dakbayan gumikan sa sunod-sunod nga pakasikop sa mga lambigit sa teroristang grupo.
Kini matud pa ang nagpamatuod nga nagpabiling luwas ang Gensan batok sa unsa mang bahad sa siguridad.
Dugang pamahayag ni Kag. Yumang nga gumikan daghan ang mga entry point sa gensan, dili gyud malikayan nga adunay makalusot.
Apan dili matud pa pasabot nga huyang ang kapulisan gumikan masudlan, kundili, ginatugutan matud pa nga makalusod ang mga miyembro sa teroristang grupo sa dakbayan aron nga diri mismo sila madakpan.
Sa karon iyaha pang ginapa-abot ang dugang impormasyon gikan sa kapulisan kung unsa ang mga posibleng plano sa maong grupo sa dakbayan.
