Mosalmot sa himoong lihok protesta ugmang adlawa dinhi sa Cagayan de Oro ug Bukidnon ang Kalumbay Lumad Regional Organization.
Kini ang gipahibalo ni Kalumbay Chairperson Datu Jomorito Goaynon sa dxCC-RMN Cagayan de Oro.
Ang protesta ugmang adlawa dungan sa paghandom sa pagdeklara ni kanhi Presidente Ferdinand Marcos sa martial law niadtong Septembre 21, 1972.
Matud ni Datu Goaynon nga gusto nilang ipaabot sa gobyerno ang ilang panawagan nga hunungon na ang Martial Law sa Mindanao.
Lakip usab sa ipanawagan ugmang adlawa nga hunungon na ang pagpasurrender ug pagpasaka sa mga hinimo lamang nga kaso batok sa mga lumad ug mag-uuma, ihunong ang militarisasyon sa komunidad nga maoy hinungdan sa pagbakwit ug labaw sa tanan hatagan og hustisya ang tanang mga biktima sa paglapas sa tawhanong katungod.
