General Santos City—Gikalipay sa Police Regional Office 12 ang pagkamatay ni ISIS Emir Isnilon Hapilon ug sa lider sa maute Terorist Group nga si Omar Maute , sa clearing operations nga gilusad sa mga awtoridad sa gyera sa Marawi.
Sumala ni Police Senior Supt. Manuel Lucban Jr., Deputy Regional Director for Administration sa Police Regional Office 12 nga ang kamatayon sa duha ka mga tag-as nga lider sa terorista kalampusan dili lang sa militar kon dili apil na sa kapulisan.
Tungod niini huyang na ang pwersa sa mga terorista tungod wala naman ang ilang lider nga maoy nagmando ngadto kanila. Aminado hinuon ni Sr. Supt. Lucban nga ang kamatayon nilang Isnilon ug Omar Maute dili garantiya nga matuldukan na ang terorismo sa nasud hilabi na dinhi sa Mindanao tungod aduna gyo’y mga miyembro sa maong grupo mga mang-ambisyon nga mahimong lider niini.
Samtang mas gipahugtan pa karon sa Police Regional Office 12 ang ilang gipatumang seguridad sa rehiyon. Sumala ni Col. Lucban nga adunay mga posibilidad nga mubalhin ubang lugar sama nalang sa Region 12 ang nahibilin pang miyembro ug sympathizer sa Maute group. Tungod niini dili nila tugutang masudlan sa maong grupo ang rehiyon mao nga ilang gipaalarma ang tanang kapulisan sa mga probinsya ug syudad.
Nasayran nga kagahapong adlawa, hingpit nang gitapos sa operaba sa militar ang kinabuhi nilang Isnilon hapilon ug Omar Mauti human sa halos lima usab ka bulan nga makigsangka batok sa mga nahisgutan. Sa kasamtanga nagpahigayon gihapon ug clearing operation ang otoridad sa balwarte sa mga terorista gumikan aduna pay nahibiling pipila nalang ka miyembro sa maong grupo.
