Natapos na kagahapong adlawa ang Kambisita o pagbisita sa mga residente sa Lumbac Marinaut, Marinaut West, DatuNaga, Dansalan ug Datu sa Dansalan nga gitawag og Sector 9 sulod sa ground zero sa Marawi City.
Nasayran nga sugod niadtong Abril uno, gihatagan sa kahigayonan ang mga residente nga makabisita sa ilang mga nagubang balay sulod sa kanhi main battle area aron masalbar o makuha ang unsa mang nahibilin ug magamit pang butang human ang lima ka bulan nga gubat niadtong miaging tuig.
Tungod niini, wala nay mga residente ang tugotang makasulod sa most affected area sugod karong adlawa tungod kay magsugod na ang mga Army Engineers sa ilang himoong debris clearing.
Nagpasabot kini nga hingpit nang gubaon ug bungkagon ang mga istraktura nga gipanag-iyahan sa gobyerno alang sa ipahigayong rebuilding ug reconstruction sa Marawi City sa Hunyo ning tuiga.
Una nang gipahayag ni Housing Assistant Secretary Felix Castro, ang field office manager sa Task Force Bangon Marawi nga ilakip nila sa debris clearing ang mga pribadong istraktura kung adunay pagtugot gikan sa mga tag-iya niini.
