Mas gipahugtan pa sa City Health Office kon CHO ang kampanya batok sa sakit nga dengue tungod sa taas nga ihap sa kasong dengue ning syudad.
Kini pinaagi sa ilang “house-to-house” campaign.
Matud ni Dr. Fe Bongcas, City Health Officer nga misaka sa 97% ang pagsaka sa kasong dengue sa Cagayan de Oro sugod Enero hangtud Hulyo ning tuiga o 1,156 ka kaso kompara sa 585 cases lamang sa susamang mga bulan sa milabayng tuig.
Sa datos sa City Health naa nay 11 ka tawo ang namatay tungod sa sakit nga dengue.
Nasayran nga nag-una ang Barangay Carmen sa top 10 ka mga barangay nga dunay taas nga ihap sa kaso sa dengue.
Lakip sa mga top 10 barangays ang Canitoan, Lumbia, Balulang, Lapasan, Patag, Kauswagan, Gusa, Iponan, Bugo, Bulua, Macabalan ug Macasandig.
Alayon niini, gidasig ni Dra. Bongcas ang mga opisyales sa barangay lakip komunidad sa pagtinabangay nga mamentinar ang kahinlo sa ilang dapit aron malikayan ang dengue.
Una nang gideklara sa Department of Health ang national dengue alert diin lakip ang Northern Mindanao nga anaa sa epidemic threshold na.
Nasayran nga mokabat na usab sa kapin 11-mil ka kaso ang natala sa DOH Region 10 ug 44 niini ang namatay.
