Gikansela sa First Division sa Comelec Manila ang kandidatora ni Cong. Pedro “Peter” Unabia nga mikandidato ug midaog pagka-Vice Mayor sa Gingoog City ubos sa Partido Padayon Pilipino niadtong Mayo 13 nga eleksyon.
Kini pinasikad sa desisyon sa Comelec 1st Division nga ilang gi-promulgate, gipakanaog ug gipirmahan niadtong May 29, 2019, kinse ka adlaw human si Unabia nakadaog pagka-Vice Mayor sa Gingoog City batok ni Incumbent Mayor Marie Guingona.
Nasayran nga ang maong desisyon gipirmahan nilang Al Pareño, Presiding Commissioner; Ma. Rowena Guanzon ug Marlon Casquejo, Commissioners.
Basi sa dose ka pahinang desisyon nga gipakanaog sa Comelec, gipaboran sa first division sa COMELEC ang Petition ni Atty. Miguel Padilla Paderanga.
Mahinumdoman nga niadtong November 9, 2018, nag-file si Paderanga og Petition sa COMELEC ug iyang gipangayo sa maong buhatan nga ikansela ang Certificate of Candidacy ni Unabia isip kandidato pagka-Vice Mayor sa Gingoog.
Giakusahan ni Atty. Paderanga si Unabia nga nakahimo sa Material misrepresentation sa iyang pag-file sa COC niadtong October 16, 2018 isip Vice Mayor sa Gingoog City.
Basi sa iyang COC nga gi-file sa Comelec nga residente si Unabia sa Barangay San Luis, Gingoog City apan sa petisyon nga gipasaka ni Paderanga sa Comelec iyang gibutyag nga si Unabia residente sa Sugbongcogon, Misamis Oriental ug dili sa Barangay San Luis sa Gingoog City.
Dugang pa ni Atty. Paderanga nga wala pa mag-usa ka tuig si Unabia nga nagpuyo sa San Luis, Gingoog City.
Kini tungod kay dihang nag-file si Unabia sa iyang COC niadtong October 16, 2018, wala pa siya mag-usa ka tuig nga nagpuyo sa Gingoog tungod kay niadto pa lamang siyang Pebrero 26, 2018 gihatagan og Building Permit sa Gingoog City hall aron magtukod sa iyang balay sa Purok Duterte, Barangay San Luis sa maong lungsod.
Gipahayag usab ni Cong. Unabia nga ang iyang balay sa Sogbongcogon iyang kanhi residensya apan mibalhin na siya pagpuyo sa Gingoog human nakapalit og yuta sa maong syudad.
Apan gibutyag sa Comelec nga ilang gisabot ug gidawat ang mga rason ni Unabia sa iyang residency sa Gingoog Gity.
