Napatay sa kapulisan sa Cagayan de Oro ang usa ka kanhi tokhang surenderee nga misukol atol sa buy bust operation sa Zone 3, Barangay Agusan kagabie.
Matud ni Police Chief Inspector Evan Vinas, Hepe sa Puerto Police Station nga ang suspek mao ang 30 anyos nga si Jovanie Nazareno, taga Barangay 35 ning syudad.
Gibutyag ni Vinas nga unang nagpabuto ang suspek sa mga operatiba ug mibalos lamang ang kapulisan hinungdan nga nakaangkon og duha ka igo sa dughan si Nazareno nga maoy hinungdan sa iyang kamatayon.
Nakuha gikan sa suspek ang shabu, buy bust money, drug paraphernalia ug .45 armas.
Gihimo ang operasyon pinaagi sa hiniusang pwersa sa kapulisan sa Puerto ug City Drug Enforcement Unit.
Nasayran nga si Nazareno maoy ika-napulo nga drug personality sa Cagayan de Oro nga napatay human misukol sa kapulisan.
