Gikumpirmar ni Pol. Lt. Col. Surki Serenas ang Hepe sa Valencia City Police Station nga mikabat sa kapin sa 200 ka indibidwal ang ilang nasikop atol sa gihimong Oplan Galugad niadtong adlawng Sabado.
Matud ni Lt. Col. Serenas nga ang maong ihap adunay nagkalain-lain nga kaso ug kadaghanan niini mao ang operation nila sa curfew sama sa pag-inum sa pampublikong lugar ug vandalism.
Dugang pa ni Lt. Col. Serenas nga gawas niini,  duha usab ka lalaki ang ilang nasapong nakighilawas sa plaza sa Valencia City.
Nasayran nga ang duha dili taga Valencia City apan gi-refer ang kaso niini sa lokal nga kagamhanan sa Valencia aron kini na ang mag-determine kung unsa nga kaso ang atubangon sa duha ka lalaki.
Samtang nasikop sa operasyon sa Oplan Galugad ang number nine nga most wanted person.
Gawas niini, 17 usab ka chinese nationals nga adunay kakulangon sa immigration document ang ilang naimbitar sa ilang buhatan aron nga pangitaan sa maong papeles.
Kini pinaagi usab sa koordinasyon sa Bureau of Immigration kon B-O-I.
Nasayran nga kung dili pa mahatag sa nasangpit nga chinese nationals ang gikinahanglang dokumento sa pagbalik sa B-O-I mahimo sila nga ipadakop o kaha ipa deport pabalik sa China.
