General Santos City–Gikabutyag ni SF03 Rey Emperio ang Chief Investigator sa BFP Gensan nga gibana-banaang moabot sa 252,000 ang damyos sa nahitabong sunog niadtong nakalabayng adlawa sa Brgy.Tambler ning syudad kung asa tulo ka panimalay ang naugdaw human gilamoy sa kalayo nga gama lamang sa light materials nga gipanag-iyahan nilang Yahiya Macaludos,Mad Lasid ug Tato Gaylon.
Sumala pa ni Emperio nga nagpadayon pa ang ilang imbestigasyon gumikan kay basi sa pamahayag sa mga residente sa lugar nga nagsugod matud pa ang kalayo sa usa ka kubo nga maoy ilang gihimong luto-anan kung asa niadtong higayona nagluto matud pa ug kan –on si Tato gamit ang kahoy ug iya kining nabiyaan gumikan kay dunay giadtoan.
Saysay pa sa nasampit nga imbestigador nga mao kini karun ang ilang lantawon sa imbestigasyon kung ang pagbiya ba sa lugar samtang dunay ginaluto ang hinungdan sa maong sunog.
Kahibaloan nga una nang nakadawat ug tawag ang buhatan sa BFP Gensan kalabutan sa panghitabo kung asa gilamoy na sa kalayo ang mga panimalay dihang nahidangat sila sa area nga wala man usab natala nga mga casualties ingon man injured sa maong sunog ug gideklara kining fire out pasado alas 2:00 sa hapon.
