Mokabat sa kapin 400-mil pesos nga balor sa alahas ang nadala sa mga tulisan human gitulis kagahapon sa alas-2:20 sa hapon sa tulo ka wala mailang suspek ang JOHARLEM ENTERPRISES nga nahimutang sa Villarin Street, Carmen ning syudad.
Matud ni Police Major Ian Borinaga, Hepe sa Carmen Police Station nga human nila madawat ang report kalabot sa insidente gilayong miresponde ang ilang kapulisan.
Gibutyag ni Jowell Panganiban Dadan, 42 anyos, minyo ug taga Silver Creek Subdivision, Upper Carmen ug tag-iya sa JOHARLEM ENTERPRISES nga gidala sa mga tulisan ang ilang Gold bracelet nga nagbalor sa 120-mil pesos; Gold Necklace nga 1000-mil pesos; Eagles Fraternity gold ring nga 55-mil pesos; RADO wrist watch nga 75-mil pesos ug duha ka gold ring nga 54-mil pesos diin ang tanan nagbalor sa 404-mil pesos.
Gikuha usab sa mga tulisan ang Casio Wrist Watch ni Dam Mark de Gracia, 39 anyos, minyo nga taga-Parola, Macabalan ning dakbayan ug trabahante sa JOHARLEM Enterprises nga nagbalor sa tres mil pesos.
Nasayran nga human nakuha sa mga kawatan ang maong mga butang, nagpaboto pa og kausa ang usa sa mga suspek gamit ang gituhoang 9MM nga armas, basi na usab sa nakuhang usa ka fire cartridge ug usa ka deformed fired bullet.
Matud pa nga ang mga suspek anaa sa 5”4 ngadto na sa 5”6 ang height, chubby ug medium ang panglawas, clean cut hair ug nagsuot sa bull cap, kinsa daling misibat sakay sa XRM-125 nga motorsiklo color pula ug puti nga combination apan wala masayri ang plate Number.
Sa karon, padayon pang gipaubos sa imbistigasyon sa Carmen Police Station ang maong kaso aron maila kung kinsa ang mga suspek nga mitulis sa maong establisemento.
