General Santos City—nakabsan na sa iyang kinabuhi ang Barangay Kapitan sa Barangay Nalus, Kiamba, Sarangani Province human kining gitigbas sa usa ka residenti sa samang Barangay alas 10:00 ang takna sa buntag, Martes, July 11, 2017.
Alas 10:45 ang takna sa buntag, Miyerkules, July 12, 2017 nakabsan sa iyang kinabuhi si Barangay Nalus Kapitan Nansanciano Marcillana Jr., legal age, residenti sa samang Barangay gumikan sa grabeng samad nga naangkon niini sa iyang ulo nga milahos sa iyang liog.
Sumala ni Police Chief Inspector Rey Salgado, Hepe sa Kiamba Municipal Police Station nga wala gyud nakalingkawas ang biktima sa baba sa kamatayon human unang gideklarang kritikal tungod sa iyang samad nga naangkon. Human sa halos usa ka adlaw nga pagpabilin sa ospital nakabsan gyud kini sa iyang kinabuhi.
Sa kasamtangan ang patayng lawas sa Barangay kapitan ang anaa na sa lokal nga punerarya sa dakbayan sa Gensan ug gikatakda usab kining pagadad-on sa Kiamba, Sarangani Province unyang hapon.
Kung kahinumduman nga una nang gitigbas ang maong Kapitan sa suspek nga si Fernando Kumalig, legal age, residenti sa Prk. Talisay, Barangay Nalus sulod mismo sa compound sa Barangay Hall. Nasayran nga patay usab ang suspek human nga napusilan sa nag responding pulis.
Si Kumalig ang gikaingong adunay batasan nga dili masabtan sa pamilya niini tungod dunay higayon nga kalit ra kining masuko.
sa kasamtangan padayon ang gihimong imbistigasyon sa kapulisan kalabutan sa insidenti aron masayran ang motibo sa suspek sa pagpanigbas sa Barangay kapitan.
