Gitintal ni City Councilor Edna Dahino ug Suzette Daba sa atobangan sa daghang mga tawo si Kauswagan Barangay Kapitan Pedro Balite nga mobiya na sa Partido Padayon Pilipino ni kanhi Mayor Vicente Emano ug motampo sa grupo sa politika ni Mayor Oscar Moreno.
“Kon mahimo kap, tampo na sa grupo namo ni Mayor Moreno kay mas maayo gyud ang kaabag” matud ni Dahino,
Ang pagtintal ni Dahino kang Kapitan Balite atol sa Ground Breaking niadtong Martes sa 48 classroom Building nga i-construct ni Mayor Moreno sa Barangay Kauswagan.
Ingon usab niini ang pagtintal ni Councilor Suzette Daba ang chairman sa Committee on Education sa City Council ngadto kang Balite.
“Daghan gyud kaayo ang mahimo basta kaabag ang tanang official” matud ni Daba.
Sa ilang kabahin, gipahayag ni Mayor Moreno nga sila sa City hall duna nay ilang gitawag nga “Barangay Kaabag” tungod sa pagtinabangay sa Chief Executive Department, City council ug sa mga barangay kapitan tungod sa pagtampo ni kapitan Yan Lam Lim sa barangay 40 sa ilang grupo sa administrasyon isip Presidente sa Liga ng mga barangay ning syudad.
Sa iyang kabahin.
Wala magpadala si Kapitan Balite sa tintal nila Kagawad Dahino ug Daba.
Matud ni Balite nga walay problima alang kaniya kon magpabilin siya sa grupo sa Padayon Pilipino total iya man nga gisuportahan ang mga proyekto ni Mayor Moreno nga ibobo sa iyang barangay.
Matud ni Balite nga kon motampo siya sa grupo ni Moreno iya unang konsoltahon ang iyang pamilya.
Gipasabot ni Balite nga sa iyang pagtampo sa grupo ni Emano ang iyang pamilya ang iyang unang gi-konsulta.
