Mihatag na og direktiba si Gingoog City Mayor Eric Cañosa ug Vice Mayor Peter Unabia ngadto sa Philippine National Police aron hingusgan ang search and rescue alayon sa nahitabong pag-kidnap sa usa ka bata sa Puericulture Center, barangay 16 niadtong Agosto 31, adlawng Sabado sa buntag.
Ang maong bata gipanganak ni Marichu Tolorio Villegas niadtong Agosto 30, 2019 mga alas 8:30 sa gabii.
Alayon niini, gihangyo ni Mayor Cañosa ang mga barangay, social media ug CDRR nga magtinabangay sa pagpangita ug pag-monitor sa mga kadudahang tawo sa ilang lugar.
Gibutyag pa ni Mayor Cañosa nga mohatag sila og award uban ni Vice Mayor Unabia nga nagbalor sa 15 tawsan pesos alang sa makahatag impormasyon o makadakop sa suspek.
Samtang, Duna nay gihuptang cartographic sketch sa suspek ang kapolisan diin gibana-banang nag-edad sa 57 ngadto sa 63 anyos ang responsable sa pagpangidnap ug itumon ang pamanit niini.
Sa karon, nakigkoordinar na ang Gingoog PNP sa dool nga mga munisipyo ug police stations aron hingusgan ang pag-monitor sa mga checkpoints.
