General Santos City–Padayon pa ang ginahimong pag-imbistiga karon sa kapulisan kabahin na sa pagpamusil patay sa duha ka wala mailhing suspect nga nakasakay ug motorsiklo sa usa ka warehouse supervisor nga si Glen Elores niadtong milabay nga adlaw sa Pioneer Avenue, atubangan lang sa gitrabahuan niini.
Sumala pa ni Police Major Rexor Canoy ang tigpamaba sa General Santos City Police Office nga anaa pa sa elimination process ang kapulisan sa mga posibleng motibo sa maong pagpamusil tungod kay sa karon daghan matud pa ang ilahang ginatan-aw nga posibleng hinungdan sa pagpatay.
Sa karon ginasuta pa sa mga imbistigador sa Police Station 1 kung aduna ba kini bahad sa iyahang kinabuhi o nakalaban ayha kini gipusil patay tungod kay basi sa mga kauban sa biktima usa matud pa kini ka maayong tawo ug walay kalaban sa ilahang trabahuan.
Samtang aminado usab si Major Canoy nga dili gayud nila malokop ug bantay ang kinatibuk-ang syudad sa Gensan tungod usab sa kadako niini kumpara sa ihap sa ilahang kapulisan hinungdan nga malutsan gihapon sila sa mga kriminal.
Apan gipasalig niini nga ang kapulisan ang buhaton ang tanan aron lang nga masikop ang mga dautang elemento ug mapabilin ang kahapsay ug kalinaw sa syudad.(Dave Silagan)
