Naghangyo karon ang kapulisan sa Cagayan de Oro City ngadto sa tanan nga unta dili ipakita sa tibuok nasud ug kalibutan nga ang syudad delikado na kaayo pinaagi sa pagpost sa facebook.
Kini ang hangyo nga gipaabot sa Cagayan de Oro City Police Office o COCPO pinaagi sa liderato ni Police Sr. Supt. Nelson Aganon, Acting City Director.
Matud ni COCPO Spokesperson Mardy Hortillosa nga makadaot sa ekonomiya ug reputasyon sa syudad ang pagpost sa facebook nga dilikado ang syudad kay ikahadlok kini kung mabasahan sa mga langyaw ug dili taga Cagayan de Oro.
Naghangyo usab ang COCPO nga kung mabiktima sa krimen angayng i-report dayon sa kapulisan ug dili sa lain tawo kay ang pulis ra gihapon ang mosulbad niini.
Gipasabot ni Police Supt. Hortillosa nga dali usab masulbad ang krimen kung mareport gilayon sa kapulisan.
Miapela usab ang kapulisan nga unta matabangan sila sa pagpatunhay sa kalinaw ug dili kay tabangan og daot tungod lamang kay nabiktima sa krimen.
Gidugang ni Hortillosa nga kung naay impormasyon nga ipaabot sa COCPO mahimo lang nga mokontak sa hotline: 09364017888 or FB:pcru_cocpo.
