Naa nay person of interest ang mga police investigators sa pagpusil patay ni kanhi Mayor Joelito Talaid sa lungsod sa Kadingilan, Bukidnon niadtong Sabado ning syudad sa Cagayan de Oro.
Mao kini ang gibutyag ni Supt. Mary Hortillosa nga Spokesman sa Cagayan de Oro City Police Office.
Ang pahayag ni Hortillosa human gipalawom sa ilang mga imbistigador ang ilang imbistigasyon sa pag-ambush patay ni Mayor Talaid.
Si Tala-id nagsakay sa iyang itom nga pick –up ug nagpalit og prutas sa lane 101 sa Upper Carmen ning syudad apan gipusil sa rinding in tandem ug naigo sa bala sa 45 Caliber pistol ang ilang ulo nga maoy naghatud sa iyang kamatayon.
Apan matud ni Hortillosa nga samtang gipadayon pa sa mga imbestigador ang ilang makuting pakisusi, iya lang una nga gipogngan ang pagbutyag sa ngalan sa ilang person of interest.
Gipasabot ni Hortillosa nga sa madaling panahon, masulbad ra gihapon sa ilang mga imbistigador ang maong krimin ug ilang mapasakaan sa kaso ang mga suspect lakip ang mastermind sa maong hitabo.
