RMN LAOAG — Manarimaan ti pannakaipinal ti draft ti rekomendasyon ti provincial legal office a maipaima kenni Gobernador Imee Marcos pakaseknan ti kaso administratibo ni Mrs.Flordeliza Flojo, dati a chief nurse iti Governor Roque Ablan Sr. Memorial Hospital iti siudad ti Laoag.
Kinuna ni Provincial Legal Officer Attorney Erme Labayog a nalpasen ti imbestigasyon babaen ti pannakaisayangkat ti hearing a dimmatagan ti biang ti nagreklamo ken ti depensa.
Dagiti nurses iti ospital ti probinsia ken pribado ti nangireklamo kenni Mrs Flojo gapu kadagiti adu a kuestionda kenkuana pakaseknan iti kuarta ken ti panag-ugugalina. Rumrumuar pay nga adda dagiti napagpagurana iti nadakamat nga ospital.
Ni Atty. Marcelino Quitoras ti timmakder nga abogado ti nagreklamo idinto a ni Atty. Reynaldo Corpuz met ti abogado ni Flojo.
Innayun met ni abogado Labayog nga anyaman a mairekomendarda ket agpannuray latta kenni Gobernador Imee Marcos a mangiyetnag iti desision.
Malagip a nabayagen ti pannakadengeg ti nasao a kaso gapu iti kinaadu ti naidatag a testigo ti agsinnumbangir a partido a nasken met nga aktuaran ti provincial legal office.
Mangnamnama nga iti kabiitan a panawen ket maparuk-atan ti decision manipud ti gobernador tapno agngudon ti kaso ket asubli ti napintas a relasyon dagiti agserserbi iti gobierno ngem gapu ta ‘election period’ maitantanto manen daytoy.
Bernard Ver, RMN News
