BACOLOD CITY – ( UPDATE ) Na-inquest na ang kaso kahapon batuk sa isa ka barangay tanod sang Brgy. 16 nga ginaalegar naglampos sang baseball bat sa isa ka menor de edad sadtong Sabado sa amo man nga lugar.
Ang kaso nga serious physical injury ginpasaka na batuk kay Michael Rosales, legal ang edad kag isa ka barangay tanod sa Brgy. 16, samtang ginahulat naman ang supplemental affidavit nga iga-execute agud mapasaka ang kaso batuk sa 5 ka iban pa gid nga kaupdanan ni Rosales.
Madumduman nga ang biktima diri, isa ka 16 anyos nga bata nga lalaki nga pumuluyo sang Purok Kingfisher, Brgy. 16 sa insidente nga natabo sadtong Sabado, Agosto 25 sang gab-i.
Nag-angkon sang igo sa iya ulo ang biktima matapos ini ginlampusan sang baseball bat sa ulo sang amo nga tanod kag padayon karon nga confined sa Corazon Locsin Montelibano Memorial Regional Hospital matapos nacomatose.
Sandig sa imbestigasyon nga sadtong Sabado sang gab-I, nagasinadya-sadya kag nag-inom inom ang biktima upod ang iya 2 ka iban pa nga mga utod kag kaabyanan sa ila lugar bangud may birthday sang nag-abot ang mga tanod kag gin-imbitar ang isa sa utod sang biktima nga mag-upod sa ila.
Sang nagpamalibad ini nga mag-upod, didto na kag natabo ang rambol sa tunga sang mga tanod kag kapartidosan sang biktima kag natam-an diri ang amo nga menor de edad kon diin nalampusan ini sang baseball bat.
Ang iban pa nga mga barangay tanod ginkilala nga sanday Ben Bejemino, Christopher Abelana, Mark Anthony Bico, Johnmar Ronzales kag Michael Jamandre.
