Kaso nga reckless imprudence resulting to homicide and damage to property ang atubangon sang suspek sa hit and run incident nga ginkamatay sang 23-anyos nga engineering graduate nga si Prince Joaquin Relatos sa Mt. Carmel, Barangay Alijis, Bacolod City sang Disyembre 22.
Ini ang ginpahayag ni Police Lt. Conrado Espino Jr., commander sang Police Station 7 matapos nga nagsungka na pasado las-9:00 sang aga kahapon ang suspek nga si Ian Roy Jocalla, 40-anyos sang Phase 5, Lot 5, Block 27, Tapulanga Hills, Brgy. Handumanan, Bacolod City, nga isa ka company driver.
Suno kay Espino, sang nagsungka ang suspek ginpahayag sini nga wala niya nabatygan nga may nabungguan siya. Apang wala nagapati ang pulis diri, bangud nga kun wala ini sang nabungguan, wala sini ginpakaayo ang ginamaneho niya nga Toyota Innova.
Nahibaluan nga nakaayo na ang salakyan sang ini ang nagsungka. Nahibaluan sang Station 7 nga ginpahalin si Jocolla sang tag-iya sang talyer nga iya ginpakaayuhan sang salakyan sang nahibaluan nga ini ang posible suspek sa hit and run incident, nga ginpanawagan sa social media. Mismo mga himata man sang suspek ang nagkumbinser sa iya nga magsungka na sa mga otoridad kag atubangon ang natabo.
[image: image.png]
