Polomolok, South Cotabato –Duha ka mga kaso ang ipasaka sa kapulisan sa Polomolok, batok sa duha ka mga suspek sa kamatayon sa 20 anyos nga si Ivan Nalugon kinsa gipusil og giilogan og motorsiklo sa may Purok Matin-aw, Brgy Silway Otso, Polomolok.
Kini ang gibutyag ni Polomolok Deputy Chief Captain Rommel Hitalia sa interview sa Rmn Gensan News Team.
Sumala niini nga gawas sa kasong carnapping ipasaka usab nila ang kasong murder batok sa duha ka mga dinakpan.
Nasayran nga nadakpan ang mga suspek dihang gipahigayon sa kapulisan ang hot pursuit operation human natigayon ang pagpatay sa biktimang si Ivan.
Gikatakda usab nga imbestigahan sa Polomolok Police Station kung nahilambigit ba sa laing mga krimen ang mga suspek .
Ila usab sutaon sa LTO kung kinsay nanag-iya sa mga motorsiklo nga narekober sa kapulisan isip get away vehicle matud pa sa mga suspek.
Sumala ni Hitalia nga walay plate number ang nasampit nga mga motor hinungdan nga ilang sutaon kung dili ba kini kinarnap nga mga motor.
