Kalibo, Aklan — Bukon man it masyadong apektado ro Kalibo International Airport bangud ko pagsaylo it pila ka mga flights sa Caticlan Airport.
Suno kay Mr. Efren Nagrama, CAAP Manager nga kung nabasawan it pila ka mga flights rong Domestic hay nadugangan man rong International flights.
Kung dati may 20 ka mga flights rong Domestic makaron hay may una eon lang nga 11 kada adlaw samtang rong International flights nga dati hay 14 eamang makaron hay may una eon nga 30 kada adlaw.
Sa gihapon suno kay Nagrama nga nagapabilin sa gihapon nga problema sa KIA rong kakueangan it parking area bangud nga indi kara ma accommodate rong ibang eroplano kung magdueongan.
May una man eon suno kana nga ginapanan-aw nga lugar partikular rong maeapit sa control tower nga kung matigayon raya hay may kapin 10 ka mga eroplano rong pwede ma accommodate ugaling medyo mabuhayan pa raya bangud man sa nagapabilin nga problema sa mga tag-ana it eogta.
Dugang pa gid nana nga iga implementar man eon sa KIA rong 3 hours bago rong flight hay dapat una eon sa airport para malikawan rong pagka delay it ibang pasahero.
