ANDAM na ang pwersa ug alyado sa Kilusang Mayo uno alang sa ipahigayon nga dakong lihok protesta batok sa kontraktwalisasyon sa Mayo uno.
Gi-andam usab ang dakong effigy nga iparada sa maong grupo sa kalsada nga ginganlan og “BullyDog the ENDO lover” aron ipakita ang pagpaka-aron-ingon nga kaisog sa Gobyernong Duterte kinsa misaad nga tapuson ang ENDO, apan sa kadugayan nabulgar nga itoy sa mga langyaw ug dagkong negosyante.
Matud sa grupo, ika 115 kini nga paglab-as sa unang Labor day sa Pilipinas niadtong Mayo 1, 1903 nga gipangulohan sa Union Obrera Democratica, ang unang pederasyon sa mga trabahante sa nasud, kinsa nanawagan nga tapuson na ang monopolyong paghari sa Estados Unidos sa Pilipinas, pagpaubos sa oras sa pagtrabaho ug pagpataas sa suhulon.
Gibutyag ni Wildon Barros tigpamaba sa Kilusang Mayo Uno nga ilang papulahon ang Cagayan de Oro sa color pula aron kundinahon si Duterte sa iyang pagtalikod sa saad nga wagtangon na ang ENDO.
-o0o-
By: RadyoMaN Edgar Navarro
