Bukidnon – Angayan matud pang aprubahan sa Commission on Appointments kon CA ang appointment ni Rafael “Ka Paeng” Mariano isip secretary sa Department of Agrarian Reform kon DAR.
Sa interview sa RMN Malaybalay ngadto kang Ka Tunying Flores, ang secretary general sa Kilusang Magbubukid ng Pilipinas kon KMP gibutyag niini nga nakita nilang si Mariano lamang ang matinud-anon nga gabinete ni Pangulong Rodrigo Duterte nga mupatuman sa tinud-anay nga pagbag-o ilabina sa hisgutanang pang-agraryo.
Matud ni Flores nga walay laing secretaryo sa DAR nga tinood nga mag-uuma kon dili si Mariano lamang.
Sukad matud pa nga milingkod ang kalihim kaniadtong Hulyo 2016 hangtod Mayo 2017, anaa na matud pa sa sobra sa 24 ka libong ektarya ka kayutaan ang nahatag sa gobyerno sa mga benipisyaryo, ug mas daghan pa matud pang tawo ang makapahimulos kung magpadayon ang termino niini.
Nakita usab nga problema sa KMP nga kasagaran sa mga miyembro sa CA mga agalong yutaan nga basin ug e-reject unya ang kumpirmasyon ni Ka Paeng.
Dungan niini, nanawagan si Ka Tunying Flores sa katawhan nga suportahan ang kumpirmasyon ni Mariano kay nagtoo sila nga kini lang ang mupatuman sa tinud-anay nga repormang agraryo.
