Kusganong gihagit karun sa Kilusang Mayo Uno o K-M-U Northern Mindanao ang gobyernong Duterte nga undangon na ang ENDO (end of contract) aron maundang na usab ang sistematikong pag-abuso sa mga mamumuo.
Nakapangutana si Wildon Barros, Spokesperson sa K-M-U nganong hangtud karon dili gakatuman nga dugay na kaayo matud pa napatik sa article 106 sa Labor Code sa Pilipinas o Presidential Decree 442 niadtong 1974 pa nga illegal ang “labor-only-contracting.
Kini nga panawagan gipalanog karun sa militanteng labor group atol sa gipagawas nga report sa Belgium based nga International Trade Union Confederation diin ang Pilipinas duha ka tuig na nga lakip sa “Top 10 worst country for workers.
Gihagit usab ni Barros ang DOLE Region 10 nga istriktong imbestigahan ang mga kaso sa labor-only- contracting ug sa pagpihig sa mga mamumuo nga mag-unyon diha sa mga dagkong kumpanya.
Lakip niini ang sa Del Monte, Nestle, Coca-Cola, La farge ug uban pang kumpanya sulod sa Cagayan de Oro, Phividec area ug Iligan City.
