Nagnubo sang 40.11% ang mga krimen nga nagluntad sa syudad sang Bacolod nakaligad nga tuig 2020.
Suno sa datos sang Bacolod City Police Office (BCPO), yara sa 1,105 incidents ang nabalhag sang pulis nakaligad nga tuig. Mas manubo ini sang 740 kon ikumparar sa 1,845 incidents sadtong 2019.
30.38% man ang ginnubo sang index crimes ukon ang mga krimen batuk sa tawo ukon propiedad nga yara sa 113 incidents sadtong 2020 kon ikumpara sa 259 nakaligad nga 2019.
Sa mga non-index crimes naman ukon violation of special laws, nagnubo sang 42.58% ukon 846 sadtong 2020 halin sa 1,473 incidents sadtong 2019.
Suno kay BCPO spokesperson Police Lt. Col. Ariel Pico, nagnubo ang krimen nga nagluntad nakaligad nga tuig bangud sa ginpatuman nga Covid-19 quarantine measures kon sa diin limitado ang hulag sang tawo.
Dugang pa sini nga daku ang nangin kontribusyon sang intensified police interventions.
Yara sa walo ang focus crimes nakaligad nga tuig nga ginlakipan sang murder, homicide, physical injury, rape, car theft, kag motorcycle theft. Nagnubo ang ini nga mga kaso sang 30.35%. Nagsaka naman sang walo ang numero sang mga kaso sang murder nga yara sa 38 nakaligad nga 2020 halin sa 32 sadtong 2019.
[image: image.png]
