General Santos City–Nakatakdang pa-imbestigahan ni Police Col. Gilberto Tuzon, City Director sa Gensan City Police Office ang naunang reklamong pagpangulata batok kay Police Capt. Nemencio Calipjo, hepe sa Bula Police Station.
Tumong sa imbestigasyon aron masayran kung aduna bay kalapasan ang nahisgutang opisyal. Apan subay matud pa sa Spot Report sa kapulisan, nadakpan ang reklamante gumikan sa pagsupak sa curfew.
Paniguro niini nga hatagan niya ug patas nga imbestigasyon ang maong insidente ug awhag niya nga dili na padakuon pa ang maong insidente tungod kaya na matud pa niyang hatagan ug kasulbaran ang maong problema.
Dugang pamahayag ni Col. Tuzon nga nauna na niyang nahinabi si Capt. Calipjo human ang maong insidente kung asa gihingusgan matud pa niini nga misukol ang mga dinakpan rason nga napugos sila sa paghimo sa ingon.
Paniguro niya nga ilahang imbestigahan ang tanang anggulo ug kung adunay abuse of authority ang nahisgutang Chief Of Police maghimo usab ug aksyon ang iyang buhatan.
Lakip matud pa sa ilahang sutaon ang impormasyon nga hubog si Capt. Calipjo dihang nahitabo ang insidente. Siya matud pa mismo ang manguna sa maong imbestigasyon aron masigurong walay cover-up nga matigayon.(CDS)
