Butuan PIO- Mga Pantalan ug Airport, Kinahanglan nga Makig Alayon sa LGU Butuan aron Ma-monitor ang Mag-abot nga mga Barko ug Eroplano
Sa pahayag ni Butuan City Mayor Ronnie Vicente Lagnada sa PTV 4 sa programang Public Briefing Landing Handa PH, July 23, nagsumite na ang LGU Butuan sa full report kay DILG Secretary Eduardo Ano.
Gimando ni Mayor Lagnada nga gikinahanglan ang pakig alayon sa pantalan ug airport aron dili na mahitabo ang pagdunggo sa barko gikan Indonesia nga walay koordinasyon sa LGU Butuan.
Ubay-ubay na usab ang na contact trace nga posibleng na close contact sa tripulanteng ninaug sa Masao Port. Sumala ni Mayor Lagnada, gikuhaan og laing swab ang mga tripulante ug na close contact nila sa Department of Health. Ipailawom usab kini sa Genome Sequencing aron masayran kung dunay carrier sa Delta variant.
Aron mapugngan usab ang posibleng pagsulod sa delta variant sa Caraga, gipahugtan na ang monitoring sa mga border control points sa rehiyon maski usab sa mga airports ug seaports. Gipahayag usab ni Mayor Lagnada nga nagpadayon ang vaccination program sa syudad aron makab-ot ang tinguhang herd immunity.
