General Santos City–laing engkwentro na usab tali sa Militar ug New People’s Army (NPA) ang natigayon sa area sa Arakan North Cotabato.
Alas 8:55 ang takna sa gabie, Byernes, July 7, 2017 dihang nagkasugat ang dalan sa Tropa sa gobyerno ug sa NPA sa area sa Brgy Datu Ladayon, Arakan North Cotabato.
Sumala kang Lt. Silver Belvis Civil Military Officer sa 39th Infantry battalion, nasuta nga nagpahigayon matud pa ug preventive patrol ang tropa sa 1st platoon sa 39th IB ug Civilian Auxiliary Forces Geographical Unit (CAFGU) sa maong lugar human silang nakadawat ug impormasyon gikan sa mga residenti nga dunay presensya sa armadong grupo sa lugar.
Subay sa report , gibana-banaang anaa sa 20 ka miyembro sa NPA nga gipangunahan ni Kumander Igong ug Kumander Landong sakop sa Pulang Bagani Command 2 ilawom sa Southern Mindanao Regional Command ang nakig-pinusilay sa mga sundalo sulod sa halos usa ka oras.
Walay natalang namatay o samdan sa tropa sa Militar samtang ginasuta pa kung adunay mga angol sa grupo sa NPA kansa paspas nga nanibat human nga nalutos sa pwersa sa mga kasundaluhan.
Gilayon usab nga naghimo ug clearing operation ang tropa sa 39th IB sa kabukrang bahin sakop sa maong barangay aron masigurong wala nay nahibiling armadong grupo sa lugar.
