Sarangani Province–Katorse (14) kabuok mga Japanese national ang bag-uhay lang nibisita karong semanaha sa probinsya sa Sarangani aron personal nga masaksihan og mapamatud-an nga ang Sarangani Province ang tinuod nga nag-unang agianan kon major route sa mga migratory raptors panahon sa “autumn migration” kon pagbalhin sa pinuy-anan panahon sa tinglagas nga masinatian sa mga nasud nahimutang ibabaw sa Pilipinas.
Segun ni Cornelio “Kido” Ramirez, ang executive director sa E.C.P.C. kon Environmental Conservation and Protection Center ilalum sa buhatan ni Governor Steve Chiongbian Solon, kini nga bag-ong hut-ong sa mga Hapon nga mga bird enthusiast ang gikan pa sa grupo gitawag nga Asian Raptor Research and Conservation Network gipangunahan mismo sa ilang presidente nga si Turo Yamasaki.
Kung niaging unang semana sa Oktubre, tulo (3) ka mga Japanese national ang nibisita sa Sarangani gikan sa grupo gitawag nga Japanese Society for Preservation of Birds, karong semanaha laing katorse (14) kabuok mga Hapon ang niduaw gikan sa laing kahugpungan, og lauman matud pa nga daghan pang mga langyaw ang muari human nga nabaniog na tibuok Asya og kalibutan nga agianan ang Sarangani.
Butyag ni Ramirez, daw gihimong “stopover” sa maong matang sa langgam ang Sarangani partikularminte ang tulo ka barangay sa lungsod sa Glan nga mao ang Rio del Pilar, Laguimit og Cross, aron kapahuwayan og katiguman og kusog una pa mulupad padulong Indonesia. Sa ilang bag-o nga pagtuon, niabot na sa 135,000 kabuok migratory raptors ang gaagi sa Glan, sukwahi niaging tuig nga anaa lang sa 78,000 kabuok, kini matud pa ang pinakadakong ihap nga natala entiro Pilipinas. (News from: Governor’s Office of Sarangani)
