Padayon pang giila sa kapolisan sa Lagonglong ang biktima sa pagpamusil banda ala sais kaganihang buntag diha sa Purok 1, barangay Tabok sa nasangpit nga lungsod.
Matud ni Police Captain Marlo Lanioso, hepe sa Lagonglong Municipal Police Station, mitawag kanila ang kapitan sa barangay Tabok kinsa nagpahibalo nga dunay nakit-ang patayng lalake sa ilang dapit.
Ang maong lalake gibana-banang nag-edad sa 35 ngadto sa 40 anyos, dunay tattoo sa toong bukton nga hulagway sa usa ka babae, 5’4 ang gitas-on ug nakasoot sa blue nga t-shirt ug color brown nga shorts.
Narekober sa area ang usa ka empty shell sa 9mm ug basi sa mga residente sa area, duna silay nakit-ang itom nga awto nga misutoy pagpadagan paingon sa National Highway human sa pipila ka mga buto nga ilang nadunggan.
Sa karon, naa na sa punerarya sa Balingasag ang maong biktima sa pagpamusil.
