Davao City – Nadakpan sa Sta. Ana PNP ang usa ka lalaki human nanulis sa usa ka estudyante natigayon alas 8:00 sa gabie sa may Agdao Public Market ning siyudad sa Davao.
Base sa record sa kapolisan sa Sta. Ana PNP, naila ang dinakpan nga usa ka Joel Alvarez, 31 anyos, nagpuyo sa Coreas Village, Brgy. Leon Garcia Agdao, Davao City, samtang ang biktima mao si Arbell Talino, 19 anyos, residente sa Brgy. Calian, Don Marcelino, Davao Occidental.
Matud pa naglakaw ang biktima sa nahisgutan lugar diin kalit niduol ang suspect sa likod niini dayon mideklara og hold-up ug gibunlot sumala pa sa suspect ang iyang pitaka dayon nidagan palayo.
Nakapangayo og tabang si Talino gani gigukod si Alvarez sa mga residente diin nakulatahan kini ug nakaangkon og bun-og sa nagkadaling parte sa kalawasan.
Narekober sa suspek ang usa ka brown wallet lakip ang cash ug usa ka screw driver nga maoy gigamit sa suspect sa pagpanulis.
Kasamtangang balhug na sa Sta. Ana PNP si Alvarez ug gihikay na sa kapolisan ang kasong robbery batok sa maong suspetsado.
RadyoMaN Don Pulayao
