TACLOBAN CITY – Padayon yana nga ginbibiling an suspek ha pagpamusil han usa nga biktima dida han kasangkulop alas 11:00 han gab-i ha Brgy. 96 Calanipawan Lumbang 2 ha syudad han Tacloban.
Ginkilala an biktima nga hi Justin Homeres, 24 anyos, mayada live-in partner, utility personnel, ngan residente ha nasabi nga lugar.
Ginkilala naman an suspek nga hi Samson Balleras, 54 anyos, may asawa, waray trabaho ngan residente gihap ha nasabi nga lugar.
Ha imbistigasyon han Tacloban City Police Office, gumawas an suspek ha ira panimalay kun didto nag-iistorya an biktima ngan an iya usa nga upod, ginpusil han suspek hi Homeres ha wala nga bahin han iya sugbong ngan dapit ha iya li-og. Mayada personal nga away an duduha base ha imbistigasyon.
Sumala kan PCInsp. Rex Cantillep, tagapagyakan han Tacloban PNP, bis pa man padayon nga ginbibiling an suspek pwede na nira ini pasakahan hin kaso nga murder o di ngani frustrated homicide.
“Naghuhulat pa kita han report han aton imbistigador pero if merit han element of murder then papasakahan naton hiya hin kaso nga murder kun merit naman hin element of homicide then pwede naton hiya pasakahan hin frustrated homicide.”
Kun hin-o man an nakakakilala ha suspek sagdon han mga otoridad nga sumurender na ini para atubangon iton iya kaso.
