General Santos City—lima ka samad pinusilan ang naangkon niining usa ka lalaki nga giilang si Pogi Mislay, legal age, residenti sa Purok Saludin, Barangay Labangal Gensan human kining gipusil sa wala mailhing suspek alas 8:00 pasado ang takna sa buntag kaganina lang.
Nasayran nga samtang ang biktima anaa sa atubangan sa Aguila Glass, kalit lang kining giagian sa mga suspek nga sakay sa motorsiklo dayon gipusil makadaghang higayon.
Paspas nga misibat ang mga suspek samtang ang biktima daling gidala sa Mindanao Medical Center. Human sa pila ka oras, gibalhin ang nahisgutan sa Dr. Jorge Royeca Hospital subay sa request sa pamilya niini.
Nasayran nga lima ka mga samad pinusilan ang naangkon sa biktima sa nagkandaiyang parti sa kalawasan kansa kritikal ang kahimtang sa kasamtangan.
Sa inisyal nga imbistigasyon sa Police Station 1 migula nga lambigit matud pa sa grupo nga responsabli sa pagpangawat ang biktima ug kini karon ang gina-validate sa kapulisan.
