Davao City – Pagbasol karon ang gibati sa 27 anyos nga lalaki human kini misulay og pagpanglugos sa 16 anyos nga dalagita nahitabo kagabii sa may Sasa ning syudad sa Davao.
Sa interbyu sa DXDC News Team kang Romeo Barbansang alyas ‘Butchok’, 27 anyos, adunay ka live-in partner, gisaysay niini nga gisabayan niya si alyas ‘Inday’ gumikan nagpatabang kini og pahatod padulong sa balay sa iyang barkada sa may Sasa 13.
Sumala pa nga iya kining gi-jamming samtang sila nagbaktas ug matud pa gi-jamming usab kini gani gitintal kuno siya sa maong dalagita nga mupadulong sa mingaw nga lugar.
Dugang ni Butchok, miadto sila sa Zone 1 sa maong lugar ug didto iya lang kuno hugot nga gigakos si Inday apan kini misinggit ug nakapangayo og tabang rason nga gikulata sa mga residente ang maong suspetsado.
Giangkon usab niini nga aduna kini pagbati sa dalagita ug lango siya sa bino niadtong tungora samtang nangayo og pasaylo ngadto sa biktima ingon man sa pamilya niini.
Ipaubos sa counseling si alyas Inday samtang muatubang og kasong rape si alyas Butchok kinsa balhog na karon sa Sasa Police Station.
RadyoMaN Jason Amisola
