General Santos City—Viral sa Social Media ang usa ka lalaki nga mipakita sa iyang kinatawo ngadto sa pasahero samtang nagsakay ug tricycle.
Usa ka alias Jenjen, 19, usa ka estudyante ug residenti sa Barangay Calumpang ang mikuhag video ngadto sa suspek human nga iyang gipakita ang iyang kinatawo.
Subay sa sumbong sa biktima sa kapulisan nga misakay kini sa tricycle sa may Bulaong Terminal pauli na unta sa ilang panimalay bandang hapon niadtong Sabado. Pag abot sa sentrong bahin sa syudad usa ka lalaking batan-on ang misakay sa likod nga bahin sa tricycle atubangan sa biktima.
Pila ka minutos ang nakalabay namatikdan sa dalaga nga giablihan sa suspek ang iyang Zipper dayon gipagawas ang iyang kinatawo. Wala makapalag ang biktima sa pagtuong dunay kutsilyo ang suspek apan iyang gikuha ang iyang Cellphone ug sekritong gikuhaan ug Video ang nasangpit.
Pag abot sa Purok Puting Bato, Barangay Calumpang, minaog ang suspek samtang ang biktima nagkurog nga misumbong sa iyang igsuon kansa maoy nanghingusog nga ilang ipablotter ang suspek. Sa karon padayon pa ang gihimong imbistigasyon kalabutan sa insidenti.
